梧杞杬:負利率政策百害而無一利

A+A-
圖片來源:路透社
圖片來源:路透社

前言:真係要講聲對唔住,在下因為公務繁忙同埋病咗所以甩咗一期稿,而家拿拿臨寫返補數。其實每逢個市一chok到飛起在下都會忙啲,希望讀者朋友們(其實最重要係編輯哥哥)唔好見怪。

美國開始加息週期已經成為咗一個不爭嘅事實,而且觀乎今個月頭嘅一月就業數據其實都算靚仔(特別係wage pressure開始有上升跡象),所以在下依然maintain美聯儲局今年會繼續加息嘅睇法(在下嘅睇法係:除非今年年中開始,美國經濟開始向下走甚至有衰退現象,否則今年加兩三次或以上唔係咩難事)。不過令在下比較surprised嘅係,其他國家嘅央行(特別係大嗰兩間,即歐洲同日本央行,簡稱ECB及BOJ)開始玩負利率政策(Negative interest rates policy)。

其實相對於QE,在下係比較擔心負利率會為全世界嘅金融體系帶嚟咩影響。好老實講,QE而家都已經proven咗係無乜用,不過QE嘅後果係你極其量係印咗大量嘅銀紙,而as long as佢唔work嘅時候,呢啲銀紙就係似陰司咁坐咗喺銀行體系入面無借到出去實體經濟度。只要佢地一日唔流通,通漲係唔會因此而上漲。

不過,負利率會麻煩好多。

首先,喺而家呢個stage,歐洲同日本嘅銀行並未開始向存款人(即係你同我)倒收利息。雖然出面街好多layman話你擺喺銀行嘅錢將會俾人收利息,不過呢樣嘢並!未!發!生!好多時因為實際問題銀行根本唔可以收負利息(唔驚嚇走晒啲客?)。咁負利率其實收咩?而家係央行向銀行擺喺佢地度嘅excess reserve收利息。

其實QE同負利率背後嘅理念都係好簡單:用行政手段逼銀行借錢出去,企圖推動實體經濟。而在下第一樣諗到嘅麻煩嘢係:銀行sector嘅盈利增長死硬。以前QE嘅時候,銀行可以用極低利率同央行借錢,只要借出街就可以賺息差,甚至唔借擺喺央行或買國債都可以有錢賺。不過,而家行負利率呢個現象,就將以前嘅嘢調翻轉頭,而喺而家銀行仲未收客存款利息嘅情況之下,就解釋咗點解銀行股呢排跌到仆街。

第二樣麻煩嘢係:銀行而家唔敢收客存款利息都仲好啲,如果當銀行頂唔順(畢竟都係上市公司要交數)要收存款利息嘅時候,好多客就會寧願提走存款keep cash,因為揸cash係唔會收利息嘛;亦即係變相擠提。所以,亦有唔少嘅分析認為行負利率政策嘅同時,政府應該要ban埋paper currency。

第三樣麻煩嘢就係:貨幣戰爭繼續升級。呢樣嘢在下都講咗成年幾兩年,相信都唔洗多講,君不見而家啲外幣匯價已經chok到仆街?

有見ECB同BOJ相繼行負利率政策,不少傻豬layman喺度講話美國聯儲局應該要跟機。首先,美國經濟仲係有條件加息多過減息;二來美國銀行體系嘅情況同其他國家唔同:佢有一個非常龐大嘅Money Market(呢個係美國銀行之間trade短期債券同借貸嘅市場)。如果美國聯儲局真係行負利率嘅話,會將呢啲短債嘅茲息率推向負數,咁美國嘅Money Market就會有Break the buck嘅風險(意思係喺你買入嘅債券/借貸到期嘅時候你係攞唔足錢)。而美國Money Market對上一次break the buck係2008年雷曼爆煲之後,咁你明有幾危險啦。

所以,在下認為,負利率政策根本就係百害而無一利,如果各大央行真係要繼續玩落去嘅話,大家要坐穩,因為個股市會變得非常非常chok。

※ 此欄文章為作者觀點,不代表本網立場。 ※