FIFA 新會長恩范天奴當選無耐，轄下嘅國際足球協會理事會就搞搞新意思，將講左好多年嘅錄影重播措施推上檯面，試行兩年，喺 4 種情況之下即時翻睇錄影片段，包括係咪入波、趕人出場、判十二碼、懷疑認錯犯規球員，等到少啲爭議，同時，亦蘊釀緊改球例，以後單刀唔駛紅牌、加時增加換人次數，呢幾項就因為爭議比較大，暫時未有定案。睇得出，新會長上台想做啲野，保住 FIFA 個招牌，廢事俾白禮達影衰曬。
對於用高科技改善執法，筆者舉腳贊成。但硬係唔知點解，每次一話引入高科技執法，有好多人食飽飯無事做就好鍾意話「足球運動涉及人，人難免會出錯」、「錯判係足球一部分」，聽到呢啲言論，真係唔知好嬲定好笑。咁每個人都會死架啦，唔通你又走去死喇喎？香港咁多人咁抵死，果啲又唔見佢地去死？係咪先？人唔應該抱殘守缺，你睇特首都「知」咩叫洗版、局長又見過 Steve Jobs、白宮發言人仲識 facebook add 索女做 friend 子，你睇科技幾咁重要呀？香港再唔發展高科技好易俾人邊緣化架喇，足球唔引入高科技好易輸俾籃球排球哥爾夫球架喇！
Sorry，講得遠左少少，講返正題先，錄影重播應該都唔錯嘅，只要控制好每場可以重播嘅次數減少停頓，咁對場波嘅節奏都無咩大影響嘅，又可以減少啲誤判，起碼輸波條氣都順啲啦。之不過，我始終覺得球證無特首咁超然，即使有科技、有法治，都一樣可以打茅波，有埋新科技仲可以冠冕堂皇咁打壓你，到時球迷可能仲嬲嬲豬啊。
好似上嗰場，筆者好欣賞嘅高普帶住利物浦補時贏水晶宮 2:1，好多球迷賽後質疑賓迪基插水、馬連拿唔應該俾十二碼，咁如果有得睇錄影，情況又會唔會唔同？我就覺得無嘞。好多人會話，迪蘭尼掂到賓迪基果下咁細力，賓迪基無可能跌，一定係插水，但係迪蘭尼又真係掂到佢喎，球證可能睇完錄影都照判十二碼啦！再講，熱刺對阿仙奴場北倫敦打吡，迪亞侵犯阿仙奴球員，點解唔駛兩黃一紅趕出場？球證當時其實見到，只係選擇網開一面，如果有得錄影重播，咪又係繼續比賽！
講到底，有科技幫助，誤判情況會好少少嘅，但比賽有好多野涉及人為判斷，點解打欖球得？踢人就唔得？球證要偏幫一隊，你都吹佢唔脹！唔信你可以睇睇今時今日嘅香港啦！
