利雲:告別告魯夫

A+A-
圖片來源:路透社
圖片來源:路透社
圖片來源:路透社

上周告魯夫因癌病逝世,荷蘭一代球王與世長辭!

余生也晚,未見過告魯夫落場踢波,最多都係「摱車邊」睇過錄影片段,「告魯夫轉身」對筆者只係道聽塗說,無特別大感受,問我佢同「施丹轉身」邊個勁啲,我都唔識答你。如果話哀痛就未免矯情,但身為戰術迷,對告魯夫逝世就無疑係感到惋惜。

無錯,提出十上十落全能足球嘅「全能足球之父」係米高斯,唔係告魯夫,但告魯夫係身體力行展現全能足球的魅力,而且佢嘅理念深深影響住現代足球發展。簡單講,講球技,同告魯夫不相上下嘅大有人在,耐啲嘅有比利、馬勒當拿、柏天尼,而家就有美斯、C 朗拿度;講球員生涯成績,五六十年代嘅皇馬稱霸歐洲、近十年就有巴塞隆拿,球員奪標數目隨時都多過告魯夫,而且佢未試過捧大力神盃更加係無法彌補嘅遺憾;講球員、領隊生涯都成績輝煌,仲有個碧根鮑華;但講到對現代足球戰術嘅影響,告魯夫無出其右,有排都未可以忘記告魯夫嘅貢獻同影響。

事關以前足球嘅戰術理念好平面,好似玩緊回合制 RPG 咁,每個球員分工好清晰,每個都係做自己野,好似意式十字聯防就係靠防守球員佈防做區域防守,咁中前場球員要做咩?無人知。告魯夫嘅戰術理念,就係將回合制變成即時戰略,球員唔係企定定等波到,而係要兼顧攻守,防守球員要幫手進攻,攻擊球員又要幫手防守,無波在腳時做咩先係決定性。或者新一代球迷會覺得無咩特別,因為而家好多球隊球員都係咁踢啦,紐亞係可以用手嘅中場、碧基史東斯成日負責派牌進攻等等,但係呢啲咁自由嘅踢法係告魯夫之後先興起,哥迪奧拿、摩連奴、施蒙尼呢班當前嘅頂級教練,無一個戰術唔係以告魯夫嘅理念為基礎。如果咁講,告魯夫有幾重要可想而知啦!

睇返近十年嘅戰術流變,主要流行兩種戰術,一係以 Tiki-kata 為主,再配合高位壓迫;二係快速防守反擊。呢兩種戰術都擺脫唔到告魯夫嘅影響,而且佢嘅金句好似「踢得好睇但無成績係廢;踢得唔好睇但有成績係悶」猛咁俾人回帶,告魯夫見到咁,應該都可以安息喇!球壇要再有咁決定性嘅戰術理念出現,要等下一個告魯夫誕生(唔係祖迪),應該都唔係咁易!

※ 此欄文章為作者觀點,不代表本網立場。 ※