杜夫:多謝普捷天奴!

A+A-
圖片來源:路透社
圖片來源:路透社

上個月底,國際友誼賽英格蘭作客反勝德國 3:2,艾歷迪亞就叫人多謝普捷天奴,因為英格蘭新一代嘅正選骨幹,好似哈利簡尼、阿里,都係由普捷天奴一手提攜嘅,勞苦工高。

咁我喺度都要多謝一下普捷天奴,呢句係代雲尼亞里講嘅!

睇返今季表現,熱刺可以兩和阿仙奴、兩勝曼城、兩和利物浦,係輸過俾曼聯一場,對名牌球隊成績算係咁,但偏偏對住李斯特城聯賽就只錄取一和一負嘅成績,來回即係輸左場 6 分波,聯賽冠軍定亞軍,最後可能就係爭呢幾分。你話嘞,唔係得普捷天奴幫手,屢破強敵,李斯特城爭冠之路可能又再起波折架喇!

除左咁,普捷天奴係就係青訓一流,幫熱刺、修咸頓都搵左好多明日之星出黎,今季又幫熱刺打入前四,成績已經好好,呢樣無得同佢拗嘅!年輕球員多數體力好、有活力、初生之犢不畏虎,對住咩對手都唔驚,係今季熱刺嘅特點,之不過,年輕球員衰在唔識留放,同埋心理質素始終唔夠老波骨好。點解咁講?睇返上場,作客利物浦場波,唔知係咪因為覺得爭冠在望而心雄,求勝心切反而影響穩定,大部分球員都發揮唔到應有水準,兩個正選中堅踢到荒失失,犯左幾次致命失誤,中前場孫興民、阿里同艾歷臣表現都係水準之下,對住人地後防威脅唔大,得返丹比利同哈利簡尼叫做維持水準。如果唔係利物浦前線唔爭氣,熱刺應該連一分都無!

普捷天奴之前已經好醒,見隊波同李斯特城相距唔遠,已經毅然半力踢歐霸,等於放棄賽事,等球隊可以專心聯賽。可惜嘅係,隊波以後生仔為主,老將就話要回氣,但後生仔踢唔踢歐霸都爭唔遠,一周雙賽都唔算大問題,而且咁講法,隊波無個老大哥壓住場,關鍵時候沉唔沉得住氣,都真係好難講。上場對利物浦荒失失,黎緊星期日尾場對曼聯,對住今季對強隊有一手嘅曼聯,都有失分嘅危機。如果熱刺再自己失分,雲尼亞里仲唔係要講聲多謝?

雖然熱刺今場奪冠就難啲,不過計我話,普捷天奴如果下季搵到耶耶托尼、阿迪達呢類經驗豐富嘅老將返黎,帶住班生牯仔成長,學張家輝話齋,你而家無嘅,但係將來會有!

※ 此欄文章為作者觀點,不代表本網立場。 ※