利雲:優點即缺點

A+A-
圖片來源:路透社
圖片來源:路透社

 

球季進入大直路,歐冠同歐霸四強都已經產生。睇完歐冠八強兩回合嘅賽事,戰果其實唔算太出人意表,即使禾夫斯堡主場贏到皇家馬德里 2:0,返到班拿貝都幾難有運行,最後倒輸 3 球;曼城作客巴黎早著先機,取得 2 個重要作客入球,為晉身四強打下基礎;而大熱門嘅巴塞隆拿對住隊型一流嘅馬體會,只得無奈出局;而拜仁慕尼黑對賓菲加,唔駛講喇掛?

睇返賽況,就發現原來你嘅優點就係你嘅缺點,世事原來就係咁玄妙。此話何解?好似曼城對巴黎聖日耳門咁,未開賽前,大部分人都覺得巴黎可以秤先半格,始終伊巴謙莫域大勇、後防穩固,加上聯賽已早早奪冠,可以專心歐聯;相比之下,曼城今季傷兵累累,甘賓尼、阿古路等主力先後受傷,能夠 full team 應戰都唔係好多場,加上後防文加拉、迪米捷尼斯今季表現似足計時炸彈,斷估都贏唔到巴黎啦!

巴黎班球員都應該係咁諗,但就係咁先易俾自己蒙蔽。事實上,巴黎其實唔係想像中咁強,上一圈對住車路士時,無疑係技術性擊倒對手,但第二回合時哥斯達傷出、夏薩特繼續態沉,咁相比之下,巴黎後防自然穩如泰山;而伊巴對住今季失色嘅車路士後防,對手仲無左今季表現最好嘅蘇馬,巴黎贏係應該嘅!之不過,巴黎係咪真係咁強?大衛雷斯對次一級對手踢到曉飛,但一旦心雄輕出,就好易失波;中場馬度迪算係歐洲頂級,佢拍住嘅係年華老去嘅莫達或者未完全成熟嘅華拉提、拉比奧,你就知咩事啦;前線伊巴 fit 係 fit,不過點計都步入球員生涯晚期、迪馬利亞又狀態飄忽、卡雲尼同柏斯托尼又唔係成日有得出。呢堆問題順風順水唔多覺,一到歐冠對住歐洲頂班球隊就表露無遺。

呢番說話對住巴塞講都一樣啱。無錯,賽前大熱、上季三冠王、MSN 默契一流,巴塞幾乎人見人怕,唯獨馬體會唔係。巴塞呢十年的 tiki-taka 所向披靡,不過缺點亦都十年如一日,就係制空力不足、後防質素一般,其實佩奧爾退休後,巴塞後防始終未有一級後衛出現,碧基只係用波同助攻屬一級,防守能力遠遠未夠。如果 MSN 強勢,呢個問題就唔係問題,只是前線啞火,後防問題就好似嚴重咗。點都好,下季中場加快接班,後防買多一兩個可靠中堅,巴塞咪又繼續係熱門!

好喇,馬後炮左成篇文,如果就咁睇呢四隊,問我邊隊缺點最少、最有機會奪冠?曼城傷兵多、拜仁中堅荒、皇馬 C 朗獨大而隊型欠奉,所以我會答馬體會。

※ 此欄文章為作者觀點,不代表本網立場。 ※