杜夫:英格蘭脫歐成功 鶴臣功不可沒

A+A-
Cl_dXyhWgAAZaOk
兩大脫歐功臣,一個入球,一個助攻。 圖片來源:twitter

歐洲國家盃去到 8 強階段,最令人跌眼鏡嘅係英格蘭爆冷輸俾冰島,16 強執包袱。冰島首次打入決賽周就晉身 8 強,英格蘭一星期「脫歐」兩次,都係多得鶴臣呢個老人家咋!

鶴臣最大功勞,當然係用人唯才啦!公認英格蘭最 fit 中場嘅真禾達,全季助攻助守,協助李斯特城奪得球會史上首次聯賽冠軍,偏偏不入最後 23 人名單,只能望住球會拍檔干堤幫法國效力,大放異彩。唔揀真禾達唔緊要,如果有更好替補球員的話。只不過,鶴臣場場以完全無狀態嘅韋舒亞後備入替,擔當雷霆救兵,對冰島果場更加係毅然抽走能頂擅射(罰球)嘅迪亞換佢入黎行行企企,等於踢少個人。重用韋舒亞,唯一解釋就係,英格蘭啟動脫歐程序,需要大量文員,真禾達過度活躍,嚴重影響辦公室秩序。

其次,鶴臣苦心孤詣,擔心英格蘭足球傳統淪喪,所以將英格蘭簡單直接嘅踢法改變為歐陸式控球在腳。即使有史端寧、華迪呢啲快馬在陣,都唔打快速反撃,寧願慢慢搓、然後搓唔入,或者等史杜歷治、基爾獲加猛交失波,先至可以令英格蘭人明白到,歐陸式踢法並唔適合英格蘭,還是覺得高 Q 大棍最好。輸俾英式踢法嘅冰島,其來有自!

仲有,鶴臣唔係食古不化嘅老人家,同脫歐後又話要再公投嘅英國選民一樣,知道英格蘭係時候要變喇!睇見隔離歐盟老大哥德國由無鋒陣轉做有鋒陣,馬里奧高美斯當堂龍精虎猛;葡萄牙開賽攻門乏力,變陣守死克羅地亞,守出個未來,鶴臣覺得咁英格蘭都應該要變。由分組賽第一場開始,到 16 強賽事,除左對威爾斯果場唔小心霸氣外露,神級換人,等英格蘭反敗為勝,遏止「威獨」氣燄外,其他幾場都不斷求變,哈利簡尼、史端寧、拉蘭拿、史杜歷治、華迪輪流踢正選,等對手無路捉,贏得戰術大師嘅稱號。當然啦,唔可以唔提嘅,係佢嘅「黑暗兵法」,寧願球隊出局、自己下台,希望促使英格蘭換血呢種咁高尚嘅情操啦!

英格蘭脫歐成功,鶴臣功不可沒。愛爾蘭、北愛爾蘭都步伐一致,齊齊脫離歐國盃喇,威爾斯,幾時到你啊?

※ 此欄文章為作者觀點,不代表本網立場。 ※