【棕國好狗】道聽塗說,妄聞堅詞

A+A-

rsz_brownmorning03

(編按:狗在棕國,身不由己。由「神獸卡」作者阿塗創作插圖的「棕國好狗」,其故事設計已經相當幽默,處處散發著不可理喻的殘酷。書中所描述的專制霸權,整個「棕國」只容許棕色之物存在,也就是一個國家一隻顏色。所有「非棕色狗」一律要被消失,這童話式的文字糖衣一旦剝開,矛頭顯然直指著膚色、種族歧視等議題,也令人聯想到文革時代紅衛兵抄家清算、批鬥不斷的惡行。

現輯錄梁栢堅先生,去年為阿塗和棕國寫下的片言隻語,如何在邪惡而專制的政府內,繼續反抗,說聲加油。)

又好巧合,四年前書展,塗君神獸咭乃潮人必搶,小弟都係咁先知香港有條咁勁嘅友,之後呢幾年佢啲抽水嘢惡搞嘢撐粵嘢,不斷入侵大家FBIG,勢如蝗襲,喺香港淪陷期用幽默抵抗,將憤怒化恥笑,而大家都知方丈份人又咁小氣,又點會唔聯同十八銅人想置阿塗於死地?如果塗兄喺強國北韓新加坡,一早已經被處理,好在佢投胎於深圳河以南,方可在亂世瘋狂製造哈哈鏡,串交班粉腸。

講番本書,原著 Brown Morning 本身已經過癮,塗兄再加埋好多港式元素,創造(唔好再用「打造」喇,除非你係好中意玩SM 嘅民族)咗一本好香港味嘅圖畫書、同時亦係童話書、不幸嘅就會變成預言書。喺先進文明國家,呢本只係笑話或童話,但如果你睇到有少少戚戚然甚至肴底,咁你已經係覺醒咗嘅朋友,以後要點做亦都唔洗多講。身處此地,當呢本書笑話睇嘅人,你嘅沉默同麻木只會令本書結局成真,而香港遲啲亦都唔會再有阿塗同你玩落去,你藏有甚至閱讀過呢本書亦都可以令你同塗兄喺監倉朝夕相對。

聖賢先哲阿寶曾經話過:「人類總要重複同樣的錯誤」,誠然。古希臘伊索寓言好睇之處,就係二三千年人類性格思維缺點原來都冇咩大變:盲從、懶惰、善忘、驕傲、貪心、麻木、愚昧、短視等等,阿塗支筆,永遠喺賤賤格格處滲出善良童真,又有皇帝的新衣個細路嘅勇敢,似當年打十號風球木屋區嘅一罐罐頭,屋漏擔遮時,一世難忘嘅鼎食珍饕。

梁栢堅

2015 夏

好書推介

由香港著名本土漫畫家阿塗,為法國知名小說家Franck Pavloff的國際暢銷寓言小說Brown Morning創作港味十足的插畫。故事講述一個「棕色政權」,嚴格執法,企圖杜絕城中所有「棕色」之外的物件,只要顏色不對,便屬違法。城中人人自危,無人知道自己何時會被捕……書中所描述的故事,加上阿塗港式演繹,當中細節笑淚雜陳,既是寓言更是「預言」,準確諷刺當下香港的現況。

原著:Franck Pavloff
插圖翻譯:阿塗
出版:CUP(書展攤位:1B-A37 有售)
售價:港幣 98 元