今個夏天嘅轉會窗終於關上，英超當然又係今次嘅大戶啦，總共豪洗咗逾 11 億鎊，咁除咗幾單天價交易之外，最多人留意嘅自然係多宗「愛回家」交易！好似有普巴天價回曼聯、莫拉達重返皇家馬德里、葛斯重投多蒙特、曉姆斯回歸拜仁慕尼黑，而最令筆者驚訝嘅係，車路士標尾會以 3,400 萬鎊回購大衛雷斯呢單交易。
同之前幾單交易唔同，普巴、莫拉達、葛斯、曉姆斯都係回歸青年軍出身地，可以算係衣錦還鄉，或者係重新出發，但雷斯唔係車路士出身，佢只係效力過幾季，無前面幾個咁有象徵意義，而且喺球迷心目中，雷斯又無前幾者咁高地位，波衫唔算特別受歡迎，前季俾摩連奴以 5,000 萬鎊賣去巴黎，球迷們都認為做得好，賣到好價錢。而家車路士又出手回購，究竟用意何在？
事實上，車路士今個轉會窗嘅操作唔錯，直到呢單交易出現之前。毋須好似曼聯咁大手交易，務求重振聲威；又唔似曼城咁不斷買人無限銀彈，力求稱王歐洲；或者好似阿仙奴文員過盛，球迷一再施壓要開水喉。車路士班底唔差，又唔駛踢歐洲賽，只需針對性咁買人已經夠用，干堤、巴舒亞依都係合適合理嘅收購。問題係，車路士後防老化問題需要解決，之前已經傳過買拿坡里嘅高列巴尼、AC 米蘭嘅羅馬洛尼都不獲球會放人，事急馬行田，最後只好買返唔受新教練重用嘅雷斯返黎。
只不過，雷斯已經 29 歲，踢得幾多年都成疑問，如果高價回購倒不如重用自家青訓，好似上季外借慕遜加帕並當選最佳球員嘅基斯甸臣，點解重未可以返黎爭正選？上季季中買返黎嘅美籍中堅美亞斯加年輕力壯，有待磨練，係咪一定差過雷斯？而且雷斯年紀雖大，足球智慧就一直未見成長，就好似跑得慢、唔夠快嘅加利尼維利曾經話齋：「雷斯的防守就像是一個 10 歲的小孩在玩 PS。」或者好似曾效力車路士嘅前英格蘭領隊荷杜咁講：「雷斯足球意識像個 8 歲小孩。」魯莽輕出、放縱自由，隨時成為後防嘅計時炸彈。
不過咁，呢個交易又唔算錯得曬嘅。一、增加球隊娛樂性，如果無咗雷斯，車路士應該幾悶吓，有佢必然有驚喜，當然啦，喜的隨時係對家前鋒。二、當前鋒踢，雷米、查奧爾、班福特都先後俾人借走曬，球隊得返兩個正前鋒，雷斯可能係秘密武器。三、雷斯仲當打，筆者有信心佢今季包保唔會俾蘇亞雷斯通坑渠，同埋俾德國 7:1 大炒，下季唔敢講。
