方俊傑:準球王大戰 —— 3 個十號仔的對決

A+A-
被稱作「夏世三」的比利時十號仔夏薩特,表現飄忽。 圖片來源:路透社

執筆時剛完成十六強賽事,未開始八強。一早估到上線會緊張得多,連美斯跟 C 朗拿度兩大球王都齊齊落馬,可見水平之高;係估唔到連看似最弱的日本都交出超水準,迫到比利時出盡全力。巴西對比利時,應該是最受注目的一場八強賽事。

美斯今年三十一,C 朗更大兩歲,再勁,總不可能長期霸佔球王位置,總會真真正正出現接班人。巴西對比利時,誰勝誰負,可能就有答案。比利時十號仔夏薩特向有夏世三的稱號,世界第三喎,你未聽過?未聽過也不出奇,效力車路士,肯踢時,英超冠軍都贏到,唔肯踢時,可以連歐聯資格也爭不到。水平起落之大,跟年年閒閒地入 3、40 球的美斯或 C 朗比,無得比。跟能力跟狀態可能關係不大,跟心態有關,與領隊不和時,夏薩特往往就是帶頭逼宮的靈魂人物。車路士的辦公室政治又從來是球會中最複雜的一間。點可能保持到演出穩定?

能力愈大,責任愈大。不經不覺,夏薩特都廿七,今屆在眾多老大哥手中,接過隊長臂章,表現成熟了好多,更開始有大將之風,球隊逆境時,往往身先士卒穩定軍心。遲遲未肯跟前途不明的車路士續約,一直傳出將會轉會皇馬。如果傳聞成真,夏世三要變得名正言順,應該容易得多。

巴西的尼馬有齊球星性格特質,一直被視為球王接班人。 圖片來源:路透社
穿上施丹著過的法國十號,19 歲的麥巴比或後來居上。 圖片來源:路透社

最大勁敵正正就是巴西隊的尼馬。論鋒頭,尼馬比夏薩特有過之而無不及,在今屆世界盃,插水、演戲、誇大傷勢、贏波後失控痛哭,尼馬有齊所有球星的性格特質。無睇波都聽過尼馬大名。去季不惜由巴塞隆拿轉會巴黎聖日耳門,擺明車馬不願屈於美斯之下,野心勃勃。聞說尼馬玩厭法甲,又向巴塞拋媚眼。如果夏薩特跟尼馬來季真係一個踢皇馬一個踢巴塞,根本就是倒模 C 朗跟美斯昔日的對決,又是壞孩子大戰君子。只不過,今次是君子代表皇馬,壞孩子反而去了巴塞。

八強大戰,就是未來球王前哨戰?過埋四強戰先啦。如果法國打敗阿根廷後順利擊退另一支南美球隊烏拉圭,19 歲超新星麥巴比分分鐘後來居上一下子便過頭。廿歲未夠,已經穿上施丹著過的法國十號,曾被譽為新亨利,但神情模樣似足忍者龜的麥巴比,氣質其實更似出道初期的朗拿甸奴,純真和熱情還未被沾污,很純粹地享受快樂足球。假如保持到對阿根廷的高水準表現,能夠帶領法國殺入四強,無論面對尼馬的巴西還是夏薩特的比利時,也是一場新一代與更新一代的對決。夏薩特跟尼馬給標籤成球王接班人都有好幾年,不過,歷史告訴我們,真正的接班人從來是石頭爆出來的。所以,我睇好麥巴比呀,贏埋四強就贏埋決賽啦。仲使理下線?

※ 此欄文章為作者觀點,不代表本網立場。 ※

方俊傑,利物浦球迷,前「壹週刊」生活組編輯。主打電影介紹、人物專訪、體育專欄、電視表。著有小說「失戀二十」。