現代職業足球比賽頻密，一季閒閒地要踢四五十場波，球員狀態起伏、傷患，都隨時影響球隊表現。要一隊波成季保持好表現，除咗關球員質素、臨場戰術外，其實仲關球隊嘅戰略事！睇返英超四強，如果講戰略部署黎講，筆者就覺得熱刺嘅普捷天奴做得最好。點解咁講？
睇下李斯特城，今季表現出奇咁好，快速壓迫成個英超無出其右，係奪冠熱門，但係後備班底弱，後防侯夫、韋斯摩根踢簡單防守足球無問題，叫佢哋好似史東斯咁踢高章波就好危，又未見到咩年輕球員接棒，加上踢法好嘥體力，如果下季要征戰歐洲好易兩頭唔到岸，要長遠發展就唔多穩陣。阿仙奴方面，球隊爭咁個可靠前鋒同中堅，要出歐洲打大佬始終爭啲，雖然雲加提拔年輕球員有一手，但隊中太多文員，第二梯隊質素又唔算好，問題唔根治就好難有突破。曼城方面，哥迪奧拿下季接手，好多人憧憬拎到好成績，但睇返現有陣容，球隊老化情況好嚴重，唔少主力年紀偏大，甘賓尼、耶耶托尼、大衛施華都過曬 30，閘位嘅四個球員都係咁，即使夏天大手買人，要執靚隊波嘅結構始終都要一兩季時間。
睇完果三隊，各有各問題，咁熱刺又點呢？熱刺班底夠當打，陣中球員最大係後備龍門 31 歲嘅禾娒，之後就係正選龍門 30 歲未夠嘅洛里斯，成隊波點會無活力？而且主力球員仲有進步空間，好似上季踢起嘅哈尼簡尼、今季冒起嘅阿里都有排未見底，而且睇返普捷天奴呢幾季教波，好勇於起用新仔，隊波愈踢愈後生，完全無青黃不接嘅問題，呢樣野可以話係全英超做得最好嘅一個領隊，好似之前教嘅修咸頓就有張伯斯、佳尼、華特包斯、梳爾等新秀輩出，對球隊長遠發展、穩定攞到好成績好重要。有佢喺度，熱刺有力繼續成為英超前四份子。
講到尾，球隊要有好成績，就需要有長遠戰略。前幾年嘅利物浦、熱刺亂石投林，轉會費倒水咁駛，成績毫無起息，就最等而下之；上一季嘅車路士喺適當位置引援，買入即食嘅馬迪、法比加斯，叫做能夠頭痛醫頭，就已經算唔錯；但做得最好嘅始終係善用青訓，即使球隊突然傷病嚴重，都可以有足夠質素嘅青訓球員頂得住，先能夠攞到好成績。十年前嘅費爵爺、雲加都好拿手，而家要數，就唔好數漏普捷天奴喇！
