唔覺唔覺，英超又進入最後大直路，得返最後十輪賽事，冠軍應該無咩懸念，熱刺、曼城似乎可以保住歐聯席位，問題係利物浦、曼聯、阿仙奴拎到尾席。除咗前列位置，榜尾形勢都爭持激烈，由榜尾嘅新特蘭到第 15 位嘅李斯特城相差十分，究竟邊三隊降班呢？邊隊能夠勝利大逃亡呢？
計我話，由莫天才領軍嘅新特蘭凍過水，降班大熱。前線攻力疲弱嘅問題已經持續幾季，呢兩季都係靠老將迪科爾單天保至尊，其他隊友幫唔到忙。迪科爾聯賽入球有 14 球，交足功課，次席射手已經係入 3 球嘅安尼捷比同離隊嘅雲安荷特，之後已經無球員入超過 1 球，就知攻力係新特蘭死症。即使今季莫天才大肆引入舊部救亡，只係派拿、安尼捷比高峰已過，贊奴沙喺曼聯雪得太硬，已經失去初出道時嘅光芒，女媧都無力補青天喇！
除咗新特蘭，另一隊應該篤定降班嘅係炒完教練卡蘭卡嘅米杜士堡，兩隊死因都係前線死火。米杜士堡前線質素唔差，有尼格度、加斯頓拉美利斯，應該不至於成為英超最差攻力球隊，只係卡蘭卡戰術側重防守，入球、失球數字都偏低，但每場輸一球，同輸 5 球，聯賽一樣都係失 3 分。米杜士堡今季成日臨尾香，導致 3 分盡失。季中簽入班福特、基斯泰迪希望加強攻力，只係上陣機會唔多，加上質素所限。之後賽程難啃，國際賽後要連續作客對直接競爭對手史雲斯同侯城，如果一分都拎唔到，就係咁先。而家炒埋卡蘭卡，轉會窗又已經關上，新任領隊限米煮限飯，似乎應該為下屆重返英冠早作準備好過。
淨返最後一個降班席位尚有懸念。經過季中換領隊、大換血之後，侯城同史雲斯表現明顯有所提升，侯城簽入嘅新援蘭奴基亞、馬高域、尼亞斯都幫到球隊，史雲斯似乎展現返前一兩季嘅水準，即使而家積分落後，但如果表現無大幅回落，絕對有機會從後趕上。而李斯特城炒咗冠軍領隊雲尼亞里之後，球隊即時四連勝，即時上返安全地帶，即使有歐聯後顧，都應該足力護級成功，攞夠分上岸。
筆者估計降班尾席由水晶宮奪得。水晶宮人腳質素絕對足以留喺英超，卡巴耶、賓迪基、沙夏等都曾經效力名牌球隊，質素唔錯，而且年紀唔算太大，仲係當打之齡，應該可以留級。只不過球隊表現飄忽，好似上季前半季，水晶宮有力爭取歐洲賽資格，但下半季原班人馬作戰，表現大幅下滑，最後僅僅護級成功過關。今屆上半季持續上屆低迷表現，而且愈踢愈差。季中做得最好，係借入沙高，穩定球隊後防，球隊今季八場聯賽勝仗有一半都係近兩個月攞返黎嘅。只係似乎發力太遲，之後十場，六場要對聯賽 Big Six，仲要對侯城、李斯特城等競爭對手，要喺咁嘅賽程之下，拎多 12 分先到 40 分嘅安全線，水晶宮嘅英超之旅應該要終結喇掛？
