根據彭亦威先生憶述，七、八十年代駐港英軍管理層都是以外籍軍官為主，而沙展彭認為自己當兵「有鬼佬緣」。
「當時 Sergeant Major（總士官長）同我講，話我來香港係當度假，有啲乜嘢你幫我搞掂。有日佢同我講覺得同袍乙頭髮長，叫我叫乙去飛髮。乙同我大家都係兩柴，大家咁高咁大當然唔聽我講。Sergeant Major 知道之後就話：『好！打個電話叫乙上來見我！』」
「乙去到 Sergeant Major 個 office，點知 Sergeant Major 叫乙出返去 —— 呀彭，同我操佢入來！（用步操方式正式地再走入辦公室）。Sergeant Major 指住乙講：『你知唔知係我叫佢叫你去飛髮？今日五點鐘如果你都未飛好，我就搵個 mess tin（軍用餐盒）蓋住你個頭，突出來嘅就同你剪哂佢！』」
憶起從軍趣事，沙展彭笑言當年最唔想就係升做沙展。
「有日 Sergeant Major 同我講，要升我做三柴去守昂船洲。當時我喺新蒲崗兵房，返工非常方便。我同佢講我唔想升，點知佢話：『你唔想升就可以唔升㗎啦？我夠唔想來香港囉！』後來我同我呀媽去睇醫生，叫醫生寫醫生紙證明佢有咩病咩病，我同 Sergeant Major 講，我啲家姐呀哥全部結哂婚，屋企淨係得我一個可以照顧老母，先至甩難。」
「其實佢哋都唔想我走，因為當年乜都係我，連大 sir 對鞋都係我幫佢拎去補！有個星期日，有個電話打去我屋企，我呀媽一聽到係鬼佬就以為打錯。點知佢係咁打來，我一聽，原來 Sergeant Major 話佢擺左 Brigadier（准將）對鞋落更樓（軍營哨站），星期二 Inspection（檢閱）之前要搞掂佢！咁就死啦，星期日唔知補鞋檔有冇開，一去到個補鞋佬就話佢好多鞋排哂喺度，今日做唔切叫我走。我話我一定要今日補到，我就喺呢到等你。企左成個鐘，個補鞋佬話我怕鬼咗你！好啦，佢同我去隔兩條街鞋廠車返個底，話：『我整完呢對就幫你縫，你一個鐘頭後來攞啦！』」
談及在軍隊中，士官的形象都是非常有威嚴。但作為一個沙展，沙展彭認為兩柴（中士）、三柴（上士）的角色反而是一個「保母」。
「一隊人當中，梗係有啲人會瀨屎瀨尿。我哋要識得包容別人，幫吓佢。」
「帶兵唔可以一味靠惡，人哋唔係服你個柴，係服你個人。如果只係一味靠惡，你行開咗人哋就唔會做。你要以身作則，人哋唔做好都會覺得唔好意思。咁樣人哋先服。」
「大家一隊人，要玩一齊玩，要捱一齊捱，有乜嘢就喺所有人面前講，唔可以私下一兩個講，如果唔係就算你冇偏私，人哋都會覺得你有！」
離開軍隊之後，沙展彭從商做軍用品買賣，亦成為香港數一數二的英軍用品收藏專家，並一直以過去從軍經歷為榮。
本文中除沙展彭以外，其他人士身份不作外傳。是次訪談得以成功，全靠好友姜先生引薦，謹在此鳴謝。如果你有從軍的經歷想和讀者分享，或是單純想紀錄當年行伍逸事，請在社交媒體帖文留下聯絡方法。
