文：利雲
周日的雙紅會，曼聯憑著朗尼一箭定江山，以1:0擊敗利物浦。
睇戰情、睇數據，雙方勢均力敵，有人話曼聯贏，係贏在把握力強同埋迪基亞的高水準，迪基亞左飛右撲、屢救險球，當然功不可沒，但雲高爾的戰術部署都值得一談。
費蘭尼不廢
好多人賽前批評雲高爾戰術悶、保守，無錯，但有效，尤其對住同級對手時，力求唔輸，再等待機會，先係上策，今屆曼聯對住同級對手（曼城、、阿仙奴、熱刺、利物浦），多數唔駛輸，就係咁解。睇返雲高爾排陣，費蘭尼、舒拉達連踢中場中，組織不足、搶截有餘，睇返數據，費蘭尼頭槌好的優勢表現無遺，頭槌解圍數字、防守同進攻爭頂數據，唔係第 1 就係第 2，解圍次數同史摩寧一樣都係全場最多嘅 6 次，充分反映佢嘅破壞力，而朗尼嘅入波，就正正源於爆炸頭嘅中楣頭槌，佢嘅表現，只係僅次於迪基亞！曼聯中場防守做得好，加上後防縮得較後，進攻時大多只倚靠靴里拉串連、朗尼同馬迪爾嘅個人突破，曼聯悶係有原因嘅。
論組織同可觀性，兩隊比較，無疑係利物浦較佳。高普入主後，利物浦嘅隊形好咗，高普強調嘅全場緊迫、靈活走位、小組入楔，已經見到雛型，但係利物浦整體嘅球員質素同高普底下全盛時期嘅多蒙特仲有一段距離，前線更加係缺少好似利雲杜夫斯基呢個級數嘅射手，所以暫時都係無得比。雙紅會中，高普用法明奴打中鋒，經常拉後引對方球員走前，再俾拉蘭拿同軒達臣入楔，已經叫交到貨，唔覺唔覺佢 5 次創造機會（全場最多），係軒迪臣錄得全場最多嘅5次射門得 1 次中龍，先令人覺得法明奴行行企企、無咩作為啫。而要我選利物浦嘅最佳球員，就應該係左閘嘅摩蘭奴，搞到連加特全場隱形、達米安同楊格無力助攻，總共6次攔截（全場最多）、5 次搶斷對手傳球（全場第 3），紅軍左路先無後顧之憂咋！
呢場波，其實悶悶地，因為雲高爾排陣保守，以一分為先，贏波係 bonus ，無喺晏菲路同高普鬥攻，無犯戰術上嘅錯誤，無驚無險 3 分全袋。而利物浦，高普執教，無論場內場外，都好睇咗，但點樣將口碑變為 3 分先係最緊要！
