話咁快球季又完咗大半，歐聯八強誕生，結果無太大意外驚喜，阿仙奴繼續光榮出局、車路士連續兩季被巴黎聖日耳門淘汰，英超淨返曼城一隊能夠出線。每年黎到呢個時刻，好多媒體都鍾意拎返歐洲足協個系數黎講，睇下英超幾時俾意甲法甲追上，俾人削減歐聯名額，筆者斷言呢個可能性好低，起碼要十年八載先會發生。
睇返歐洲足協嘅系數，高踞榜首嘅係西甲，有 98.856 分，遠遠拋離第二位嘅德甲嘅 77.749 分，始終近十年嘅巴塞皇朝加上馬德里雙雄都有出色表現，令西甲一枝獨秀。之後第三位嘅係 74.284 分嘅英超，緊隨其後嘅係 70.439 分嘅意甲。英超同意甲爭 4 分唔夠，好似好易追，但事實又係唔係呢？咁要追得上，都要意甲球隊有好表現先得。環顧意甲，真係稱得上歐洲一級勁旅嘅，就得祖雲達斯一隊；羅馬、拿坡里、費倫天拿感覺俾人好感，但一同其他班霸比較就現曬形；而米蘭雙雄處於中衰期，都要幾年時間調整先可以重拾光輝。要意甲追過英超真係有啲難。
不過講真，英超又係唔爭氣嘅，而家幾隊名牌球隊一出歐洲比賽，就會發現唔係人地果皮。筆者愛隊車路士今季內亂嚴重，加上球員質素比全盛時期差，又欠缺鬥志、隊型，完敗俾巴黎聖日耳門；阿仙奴個別位置同其他歐洲豪門爭太遠，加上始終缺乏精神領袖，面對大熱門巴塞只能專心聯賽；淨返嘅曼城都唔係好好多，今季水準唔穩定，加上陣容老化，唯一可喜嘅係，今季再進一步入到八強，打破心理關口，球員心理質素應該愈來愈好，下季成績應該可以更為樂觀。而下季，李斯特城、熱刺兩隊如無意外應該成為歐聯初哥，新鮮感係有，但係成績就好難樂觀喇！
英超歐洲成績差，有人歸咎英超太激烈，好難好似巴塞、拜仁、聖日耳門咁可以專心歐戰。雖然有一定道理，不過筆者覺得英格蘭足總大責任啲，一來球隊比賽太多，聯賽、聯賽盃、足總盃，加上無歇冬期，球隊好難成季保持好表現，只能夠作出取捨，犧牲部分比賽；二來成日遷就電視轉播，搞到球隊備戰時間不足，好似阿仙奴上周日先踢完足總盃，比周六踢完聯賽、兼唔駛長途跋涉嘅巴塞少休息一日，臨場要再谷得起就比較難，呢啲咁嘅安排都唔係第一次出現。
英超球隊要再次稱霸歐洲，名牌球隊係時候坐低落黎，正視下球隊問題，睇下戰略部署、球員質素、青訓、戰術各環節有咩不足，奮發圖強，加上足總改革，咁先唔駛年年雷聲大雨聲小咁出曬局！
