我恐懼、我誤判、我愧疚！
我認，之前俾我估，我寧願估諾域治、新特蘭、水晶宮「爆冷」降班，都唔會估紐卡素，點知紐卡素贏唔到篤定降班嘅維拉，加上新特蘭兩連捷、拎得救命 6 分，提早一輪成功護級，紐卡素要陪諾域治、維拉下季英冠再見。
我估好多球迷同我一樣，情感上唔願意見到紐卡素降班收場，始終舒利亞嘅頭頂腳踢、費迪南嘅硬朗、比士利嘅靈活、真路拿嘅瀟灑，仍然活於一代球迷心目中。雖然紐卡素 08/09 年度已一度降班，但仍然是球迷心目中十幾年前果隊悅目漂亮嘅紐卡素。
紐卡素降班，始終叫人婉惜。因為球隊人腳唔差，算得上英超中游，奈何球隊管理不善，再次踏上降班之路。紐卡素今季由麥卡倫帶領，開壞個頭，季中艾殊利科水買人，買入舒維爾、唐辛、沙維特，借入杜姆比亞，雖然每一個都質素唔差，但偏偏無針對球隊兩個中堅老化嘅後防線加入新血，只識得一味買入攻擊球員，亂石投林，希望保住英超一席，等班主可以繼續賺錢。
可惜，炒左麥卡倫，聘請戰術大師賓尼迪斯救亡，無奈已經太遲。剩返 10 場波，唔係要對李斯特城、熱刺、曼城、利物浦、修咸頓幾支要爭冠、拎歐洲賽資格嘅前列球隊，就係對新特蘭、諾域治、水晶宮、史雲斯呢啲護級嘅直接對手，每一場都係硬仗，賓尼迪斯面對嘅挑戰難度可想而知。要怪應該唔係怪佢，而係幕後黑手嘅班主艾殊利。大部分紐卡素球迷應該只得一個諗法，就係想同艾殊利講：「你走啦！我唔想搞大件事！」
艾殊利劣跡斑斑都唔係今日嘅事，多次將球隊主力賣走，影響球隊結構，又唔補充新血；經常換領隊，破壞球隊穩定；唔同上季護級功臣兼抗癌英雄古迪亞利斯續約、護級之際向外表示後悔買下球隊，打擊球隊士氣。一直以來，艾殊利只係當紐卡素係一盤生意來打理，完全忽視球隊嘅傳統，漠視球迷嘅支持，但又缺乏雲加嘅手腕、眼光，長遠經營嘅視野，最後落得班主、球迷、球員三輸嘅局面！
紐卡素本來係一支傳統深厚、踢法華麗嘅老牌勁旅，自艾殊利 2007 年入主球隊之後，已經兩度降班，加上對待領隊、主力球員手法有問題，難怪能夠成為英超最神憎鬼厭嘅球會班主啦！只希望紐卡素降班之後，艾殊利能夠斷然放手，等球隊重新上路、再踏征途啦！
