四年一度嘅歐洲國家盃上星期開鑼，首輪賽事已經完成，所有熱門球隊都已經先後出場，有好多野都值得一寫，包括普巴、鶴臣嘅戰術、西班牙嘅球隊結構等等，但筆者最想寫嘅，始終都係意大利。因為意大利場波，正好印證筆者一直以來嘅想法︰戰術，係令到庸才戰勝天才嘅方法。
講返場波，論人腳，呢隊意大利嘅人腳應該係近十年甚至廿年，最無星味、最資質平庸嘅一隊；而比利時就正正係黃金一代，即使甘賓尼缺陣，人腳都贏意大利一截，所以賽前無人估到意大利能夠贏波而回。意大利贏，係贏在戰術發揮，同埋比利時嘅各自為政。
好多人睇完場波，盛讚意大利防守出色。意大利今場防守嘅特點其實只是最簡單嘅密集防守，靠人多取勝。意大利嘅 352 陣式，除左祖雲達斯果 3 個中堅外，兩個翼衛有需要時墮後協防，陣式即刻變為 532，成場波經常見到意大利嚴謹嘅戰術，每當比利時控球進攻時，意大利防線就自然縮後，5 個後衛同時進入禁區附近協防，3 個中場縮後去禁區頂附近，2 個前鋒就走去三閘線附近壓迫。面對意大利緊密嘅防線，比利時無從入手，夏薩特缺態，無辦法以個人突破扭過防守球員創造機會；迪布尼側向右邊，而唔係慣常嘅攻中位置出現，缺少遠射機會；盧卡古踢法偏柔，空有身體質素優勢都無從發揮；多數只能夠靠尼恩高蘭、韋素遠射，加上各球員罕有即時配合，難以打入意大利嘅心臟地帶。
進攻方面，意大利都井井有條。牌面上唔夠比利時好，意大利成場都以守為先，每次進攻多數只靠 4 名球員完成，即係 2 名前鋒、進攻點附近嘅翼衛，加上中場，但已經能夠製造唔少威脅。因為人數唔多，所以配合好重要，柏利同艾達馬田斯成場波走位都好靠近，方便互相支援同打 one-two，加上中場同翼衛睇準時機疊瓦助攻（簡達華尤其出色），導致每次進攻 4 名意大利球員都能夠喺小範圍以多欺少，搞到比利時應接不暇。
後面守得穩，前面反擊能夠製造威脅，令到意大利贏得比賽。當然，意大利都唔係無懈可擊，好似有一兩次角球壓上同自己中前場交失，令到後防返唔切，被迫犯規食牌，阻止對手攻勢，就反映呢種戰術宜守不宜攻，大舉壓前易錯漏百出，對住同組比自己牌面弱嘅愛爾蘭隨時失分而回。
意大利呢一個 352 陣式，令人聯想起 2000 年歐洲國家盃嘅意大利，只係後防比簡拿華路、尼斯達、甚至祖利安奴爭半班，3 個中場缺少當屆發光發熱嘅費奧利咁嘅得分人物，前線更加無得比，托迪、恩沙基、迪比亞路、蒙迪拿都係一時之選，柏利、艾達馬田斯應該連後備都做唔到。即使面目全非，但係踼出隊型，2000 年果屆有份落場嘅干地，應該感到滿意。
