利雲:利記返生?

A+A-
打波定打人? 圖片來源:路透社
打波定打人? 圖片來源:路透社

上星期英超最令人振奮嘅比賽當然係利物浦 2:0 擊敗熱刺,終於打破 2017 年嘅差劣走勢,贏返一場,相信有助提升一下士氣。尤其係踢完非洲國家盃歸隊嘅文尼對球隊幫助唔少,起碼佢嘅變速同個人突破可以撕破密集、幫球隊打破悶局。單計對熱刺嘅上半場,已經有四次嘅入波機會,如果佢把握力好啲,踢完上半場已經可以完場。有好多話利物浦返生喇!事實上又係唔係咁易呢?

其實睇返成場波,熱刺之敗,雖然對手文尼、拉蘭拿表現出色,但唔多唔少關自己佈陣出錯事。熱刺一心諗住自己班波後生有活力,想好似壓迫車路士、曼城咁瓦解對手,即使作客晏菲路都無有怕,無打算縮後防線守死利物浦。只不過咁就出事,熱刺唔記得英超除咗自己識快速壓迫,利物浦都識,結果防線推得太上,俾利物浦前線好多空間發揮。利物浦今場踢法同上屆李斯特城嘅踢法同出一轍,後防穩守,然後盡量放長波俾前線哨,再透過兩三個攻擊球員完成射門,文尼就好似上一季嘅馬列斯,扮演進攻嘅核心。再加上,熱刺左閘丹尼路斯受傷,被迫使用非常規正選嘅賓戴維斯,企位失當,俾文尼恰死、一爆再爆,如果唔係羅里斯有水準演出,熱刺隨時輸得仲慘。

今屆利記的表現,完全繫於文尼(中)腳下。 圖片來源:路透社
今屆利記的表現,完全繫於文尼(中)腳下。 圖片來源:路透社
阿里仰天長嘯中。 圖片來源:路透社
阿里仰天長嘯中。 圖片來源:路透社

不過咁,利物浦出名係英超羅賓漢,對強隊遇強愈強,對弱隊遇弱愈弱,贏到熱刺唔多出奇,問題係趁盃賽出局嘅空檔,高普必須搵到對弱旅破密集嘅方法。其實,喺足球場上,破密集主要有兩種方法,一係遠射,一係高波。遠射方面,利物浦有古天奴,只係傷癒後狀態未十足,同埋守衛知道佢遠射了得都盡量減少佢起腳機會。高波方面,前線文尼、費明奴、古天奴都係靈活型球員,之後要數已經係輪換正選嘅拿杜姆。只係韋拿杜姆係攻中,唔係前鋒,好多時企位上唔係第一點,如果要充分發揮佢嘅頭槌威力,或者就要將佢推前,費明奴或古天奴稍稍移後,先可以保持陣式嘅完整。筆者始終覺得利物浦今季嘅最大敗筆係,放走球隊嘅空中霸王賓迪基,對弱隊少咗一瓣有效率嘅高空攻勢,而又無適當嘅替補。當然啦,用賣出賓迪基嘅錢買入文尼,算係球隊今季最佳收購

利物浦今季所有盃賽出哂局,聯賽又已經俾車路士拋開一個馬位,今季只能夠專心爭前四嘅歐聯位置。如果發揮穩定,來屆有機會參加歐聯,麻煩班主約翰亨利揼本簽返個柱躉式前鋒,咁先唔駛再做羅賓漢!

※ 此欄文章為作者觀點,不代表本網立場。 ※