今屆李斯特城彈起拎到英超冠軍，好多人都讚雲尼亞里、華迪、馬列斯、干堤表現出色，讚到天上有地下無咁款，但數數埋埋就好似爭梗個人咁。無錯，果個就係最大嘅幕後功臣——老闆維猜。
維猜係泰國富豪，泰國龍頭免稅店 King Power 老闆，身家估計有 225 億港元左右，比唔少英超班主豐厚。雖然維猜無好似阿布札比集團同艾巴莫域治咁大灑金錢去買人，引入嘅多數都係價廉物美嘅球員，岡崎慎司、干堤呢啲加埋都唔夠起高鐵、一帶一路英超豪門買一個球星咁貴。但維猜成日提升球隊士氣，唔計俾人攞黎笑嘅請高僧作法，佢會請晒成隊去旅行、獎勵表現出色嘅球員，仲唔會圍晒水馬喺自己隔離，得閒搞下活動與眾同樂，請入場球迷飲下啤酒食下小食，搞到成隊好似一家人咁樣。而且唔可以講漏嘅係，佢無恃住自己係老闆，走到更衣室「看、聽、講」，插手球隊事務，叫馬列斯、華迪賽後報告做左幾次助攻、入左幾球，雲尼亞里先可以發揮自己嘅長處，帶領李斯特城創造奇蹟咋！
無錯，「老細還老細，領隊歸領隊」本來好閒，但世界上好多老細都食飽飯無野做，鍾意出黎指指點點，教你點踢波走位先至掂，以為有權有錢逆線行車都得。如果唔係咁，維猜可能唔係第一個捧盃嘅泰國班主。2007 年，泰國前總理他信宣布用差不多 13 億港紙收購曼城，將本來只係中下游球隊曼城搖身一變，改造成為英超一大豪門。
他信雖然入主曼城短短一年，但都做左唔少惹人爭議嘅決定。就好似炒左見錢開眼嘅艾歷臣，搵淨係識英式踢法嘅曉士做主帥；引入左好多球員，但球迷記得嘅應該係得伊蘭奴、祖奧，踢到而家仲喺度嘅就得甘賓尼一個。當然啦，泰國球迷可能記得他信引入左三名泰國球員，幫助泰國球員「登陸」英超，就係 Teerasil Dangda、Kiatprawut Saiwaeo 同 Suree Sukha，但千祈唔好問我佢地踢成點，因為佢地個名都係維基大神同 Google 大神講我知架咋。他信嘅最大德政，應該就係搵到阿布札比集團收購球會，然後天價引入羅賓奴等球員，將曼城推向另一個層次，呢啲已經係後話喇。
所以話，要忍手唔好搞唔屬於自己嘅野，做好自己本份，都唔係咁易架！
