利雲:摩佬回歸

A+A-
圖片來源:路透社
圖片來源:路透社

呢個幾兩個禮拜,英超最熱話題已經唔係李斯特城,而係雲高爾幫曼聯奪得足總盃之後,慘食無情雞,球會宣布,小別英超半季嘅摩連奴將擔任下季領隊,曼聯進入新時代!

摩佬回歸英超,有人歡喜有人愁,朗尼、白蘭特已經賣曬口乖、期待下季合作,傑斯、馬達就開始睇定後路,而唔少曼聯球迷拍手叫好,覺得即使可能擺脫唔到「三季魔咒」,但起碼即食,應該都會有盃落袋,告別後費 sir 時代嘅鬱鬱不得志。只不過,童話故事係咪咁美好呢?身為車迷嘅筆者覺得一切都要睇摩佬自己造化。

摩佬上季敗走英超,最大死因係俾球員杯葛,一個二個唔肯出真功夫,如果唔係嘅話,希汀克用返同一班人同一踢法,球隊成績點會判若兩隊丫?前幾年,最多人讚摩佬嘅,除左係後防滴水不漏(人稱泊大巴)、臨場變陣快外,就係佢自願成為球場焦點,團結球隊,幫球員減壓。呢種做法,經常要將焦點轉移去自己度,少不免得罪人多、稱呼人少,同雲加、哥迪奧拿、球證等等留下唔少牙齒印。對外方面已經先天不利,如果團結唔到更衣室,就會內外受敵。近嘅有上季嘅車路士,遠嘅有之前嘅皇馬。摩佬喺曼聯成唔成功,就要睇佢團唔團結到更衣室喇!而家曼聯班底比較後生,除左朗尼算係老大哥外,其他都比較易控制,但如果貿然大量引入嫡系球星(好似伊巴咁),反而容易另立山頭,分裂為摩佬營同舊球員營,對更衣室團結不利,隨時重蹈上季覆轍。點處理好更衣室問題,係摩佬成唔成功嘅關鍵。

其次,就要睇摩佬用咩戰術。無錯,摩佬以防守起家,但佢其實自從執教皇馬之後,因應球會、球迷要求,改踢控球、進攻打法,已經再唔似以前咁泊大巴。不過咁,因為呢家波始終唔係佢專長,教皇馬同車路士嘅成績,始終唔及教國米同第一次蒞臨倫敦時咁好。上季雲高爾成日俾人批評佢戰術保守,追求無意義控球,甚至仲差過九九八十一斬嘅莫耶斯。一個唔該,如果曼聯開季成績稍稍未如人意,摩佬應該會面對一樣嘅批評,到時會唔會自亂陣腳、改變戰術,真係一念天堂一念地獄。

再黎,就要睇摩佬把口識唔識收。曼聯喺費 sir 時代經常俾人話踢 4424 陣式,落到場球證有意無意都會俾下面,吹雞都會手鬆啲。而摩佬應該係鬧球證鬧得最甘最密嘅領隊,球證例牌都會揸緊啲執法。睇下下季球隊失利時,摩佬會唔會收一收口,出少句聲當幫忙,等球證俾返兩分薄面費 sir 同曼聯呢個金漆招牌。如果唔係,三年貨仔都未必有。

圖片來源:路透社
圖片來源:路透社
※ 此欄文章為作者觀點,不代表本網立場。 ※