歐洲國家盃曲終人散咗一排，唔少成績差嘅領隊已經俾人請食「豉椒炒魷」，港人愛隊英格蘭喺鶴臣帶領下成功脫歐，十六強俾冰島反勝後都辭職走人，英格蘭足總最後竟然宣布艾拿戴斯將會成為新一任領隊，就令到唔少球迷跌曬眼鏡！
對於呢個決定，大部分球迷唔單止唔睇好，甚至連睇都唔敢睇。因為綽號「大 Sam」、「大傻」嘅艾拿戴斯之前未教過大球會，教黎教去都係中小型班，布力般流浪、保頓，甚至係去季嘅新特蘭，多數都係護級份子，令人質疑大 Sam 壓唔壓得住場？究竟班球星會唔會聽佢枝笛？而且佢教開嘅球隊比較粗枝大葉，踢法體力化，同現今世代歐陸主流控球在腳、無球走位嘅流行踢法反其道而行，究竟呢種落後 30 年嘅踢法適唔適應到而家嘅戰術潮流呢？到底係咪因為英格蘭蜀中無大將，所以大傻作先鋒呢？
雖然面對咁多質疑，不過筆者對英格蘭足總呢個決定深表認同。點解？因為睇返近年嚟嘅英格蘭國家隊，每屆大賽開波前都俾人吹捧到上天，最後捧得愈高，跌得愈甘，最佳成績都係八強止步，同冠軍、以至決賽都沾不上邊。球隊實力同球迷、球員期望有好大落差，與其繼續幻想自己仲係足球強國，倒不如搵大 Sam 執教，一心一意踢擦鞋仔波，腳踏實地仲實際。球迷對球隊無咁大期望，可能仲有意外驚喜呢？
另外，睇返而家英格蘭國家隊嘅人腳，前線有華迪、哈利簡尼、史杜歷治、史端寧，個人技術普遍都麻麻，最大優勢係快，配搭中場冒起嘅熱刺孖寶阿里、迪亞，踼簡單直接足球可能發揮得仲好。你試下叫史端寧用腦踢波、史杜歷治傳波俾無球走位嘅隊友，或者叫踢中場嘅朗尼學沙維、派路咁墮後派牌，就知道英格蘭踢長傳急攻可能效果仲好。
再者，喺今屆歐洲國家盃出局之後，唔少傳媒大字標題話英格蘭輸俾冰島嘅英式足球。既然係咁，搵大 Sam 呢位最擅長踢高 Q 大棍嘅領隊任教，唔係可以發揚返英式足球嘅傳統咩？
踢波教波，從來無話咩無敵陣式、無敵陣容，一切都講因時制宜。現實咁睇，英格蘭而家班波未去到頂級，後防無泰利、里奧費迪南呢個水平嘅中堅，中場又始終爭雙特半班，前線大賽經驗又一般，跟德國、西班牙咁控球，只會死得仲慘。睇下葡萄牙有自知之明，最終守出個未來。盲目跟風，倒不如做返自己，英格蘭踢長傳急攻可能最後殺出一條新血路呢！而家最驚嘅反而係，大 Sam 想改變自己風格遷就戰術潮流，畫虎不成反類犬，咁就係咁先都得喇！
