英超話咁快又開鑼，無論賽前定賽後，第一輪賽事嘅焦點一定係阿仙奴對利物浦呢場比賽，可以一次過睇曬兩隊強隊嘅狀態，加上兩隊大手交易、快上快落，娛樂性十足，球迷們應該收貨。今場勝負只係一線之間，同兩隊今個轉會窗嘅操作有關。
先講輸波果隊先，阿仙奴嘅問題，大把人寫過，呢啲講都講到厭。筆者覺得最大問題係雲加開始迷失，點解咁講？因為以前雲加最拿手果樣係低買高賣，將亨利改造成前鋒最為人津津樂道，仲有引入韋拉、比堤等都所費不多，轉手時就聲價十倍。近季球會財政狀況改善，雲加先後斥巨資引入奧斯爾、山齊士呢啲球星，今季傳聞嘅收購目標，由華迪、希古恩、達斯拿、拿卡錫迪等等，都係名牌球員，相反地，近年以低價引入嘅球員好似無邊幾個能夠成為球隊絕對主力，反映雲加嘅轉會策略有少少轉變，以名牌為主。
之不過，引入名牌球員需要好多因素配合：一係爭標機會；二係報酬豐厚；三係主帥，三者起碼要有其二，先吸引到名牌球員來投。阿仙奴奪標機會唔係無，但如果曼城、車路士、曼聯，以至巴塞隆拿、拜仁慕尼黑呢類豪門出手截劫，球員身體就很誠實。報酬方面，雲加太精打細算，驚打破球隊薪酬平衡，出手唔夠其他球會豪爽。加上雲加俾人感覺開始跟唔上潮流，球隊士氣一般，球員喜愛高普、普捷天奴呢類當頭起嘅少帥多啲。到頭來，肯投身阿仙奴嘅名牌球員自然只有少數，雲加如果唔一改作風，或者調整策略，恐怕只會繼續險簽。
相反，利物浦今個轉會窗操作得唔錯，睇今場發揮，幾個新援都對辦，好似文尼個人表演、殺入禁區射成 4:1 果球，呢季表現值得期待，拍住古天奴、費明奴，威力可能唔差過蘇亞雷斯、史端寧、史杜歷治嘅三叉戟組合；韋拿杜姆上半場表現麻麻，下半場多咗殺入禁區，就顯示到佢嘅優點，佢嘅加盟能夠增加球隊中場嘅攻擊力；後防卡拉雲平均能力唔錯，可以增加後防穩定性。如果能夠引入一個優秀左閘同增強防中位置，咁隊波應該有力挑戰前四、以至冠軍。
利物浦知道自己定位，無歐聯踢，吸引唔到名牌球員加盟，但係高普有個人魅力搭夠，對簽心儀球員有幫助。而且專挖排名比自己低，又喺英超證明過自己實力嘅球員，風險自然比較低，文尼、韋拿杜姆都係好例子。比較之下，自然明白今場以至今季兩隊嘅分野所在。
