今季英超最矚目嘅大戰即將上演，無錯，講緊嘅就係黎緊嘅曼市打吡喇！哥迪奧拿來到英超之後第一個真正考驗，將會遇著冤家摩連奴執教嘅曼聯，由西甲鬥到英超，火藥味應該特別濃，不容錯過。呢場波除咗兩個教頭好睇之外，仲有好多地方值得注意嘅，好似曼城幾個新兵傳言準備就緒，巴禾、辛尼、根度簡都有機會落場，而曼聯就要睇今季回勇嘅華倫西亞能唔能夠傷癒復出、喺國家隊 U21 大演帽子戲法嘅拉舒福特會唔會擔正。兩隊實力接近，筆者覺得勝負關鍵應該係兩隊嘅脊骨表現。
脊骨係指一隊波由前到後嘅主力球員，一隊球隊要穩定咁拎到好成績，一條好嘅脊骨係不可或缺。就好似以前稱霸嘅阿仙奴，前有亨利，中場有韋拉，後防有阿當斯，門將有施文，面對強隊弱隊都有穩定演出，幫球隊逢關過關；前幾年嘅車路士，杜奧巴、林伯特、泰利、施治，即使隔離隊友點換法，地位都穩如泰山，而且表現一貫咁可靠，喺關鍵時刻發揮作用。
呢兩三季，曼城都有一條好嘅脊骨，由阿古路、耶耶托尼、甘賓尼、祖赫特組成，幫球隊取得唔少佳績，只係漸漸老化，加上阿古路今場停賽，耶耶托尼不受重用，甘賓尼持續受傷患困擾，赫特被外借去拖連奴，相信會影響球隊穩定性。當然啦，曼城有好多優質球員可以頂替，除咗巴禾同赫特實力比較接近，其他位置都同呢幾位主力有啲距離，史東斯對強隊表現如何、會唔會輸經驗？迪布尼上屆上半季表現神勇，下半季開始隱形，點樣提高佢嘅穩定性？阿古路唔在陣，史端寧、伊軒拿祖有無表現？呢啲問題，真係落到場先知。
相反，曼聯今季嘅脊骨已經成形，前有伊巴謙莫域，中有普巴，後有拜利，門將繼續係迪基亞。伊巴謙莫域霸氣十足，唔駛多講；普巴返黎之後，已經證明自己有力幫球隊控制中場；拜利獲得球隊上個月最佳球員獎項，表現得到球迷認同；呢幾年同雪糕筒做隊友嘅迪基亞，實力、穩定性唔駛擔心。呢四個主力球員，唔計伊巴謙莫域，其他都好後生，有潛質成為曼聯未來 5 年嘅主力，今季砌好呢條脊骨對球隊未來嘅成績好重要。面對住曼城呢個等級嘅對手，最大隱憂應該係後防拜利，雖然身形速度等基本條件都幾好，但面對攻擊點眾多嘅曼城，真係考牌之戰。呢場食粥食飯，真係睇兩隊嘅脊骨表現如何，雖然聯賽而家先係起步階段，但兩隊如果能夠一挫死敵，就能夠提高球隊信心，對今季爭標有好大幫助。
