上周英超榜首大戰，車路士作客反勝曼城 3:1，延續 343 陣式嘅連勝強勢。賽後有唔少花生，媒體焦點都落喺臨完場施展奪命鉸剪腳被逐嘅阿古路、叉頸嘅費蘭甸奴、或者摑人嘅法比加斯身上，但場波其實仲有好多野睇，今次筆者想講下哥迪奧拿嘅排陣。
簡單講，筆者認為今場波勝負關鍵有兩樣：一係把握力、二係運氣，哥迪奧拿嘅排陣唔算太錯。點解咁講？因為呢場曼城主場，要奪標，就要借主場之利打斷爭標對手車路士嘅氣勢，咁先有機會反壓上榜首，加上曼城近季都以進攻足球為主，所以曼城必然焗攻。曼城要攻，踢三後衛陣式無可厚非，唯一值得斟酌嘅係落後下抽走後衛，係抽史東斯，而唔係有黃牌在身嘅奧達文迪（高拉洛夫雖然慢，但有死球幫手，留到最後做必殺技都合理），間接俾機會夏薩特最後再下一城。曼城喺自己連番失機，久攻不下，俾把握力強嘅車路士反擊得手都好合理。
其次，筆者之前已經講過車路士嘅 343 陣式特點係多人同機動，靠機動踢法製造小區域嘅人數優勢。針對呢個特點，哥迪奧拿嘅排陣，中前場 7 個球員中，除咗費蘭甸奴係防守球員外，其他都係攻擊球員，而且辛尼、大衛施華、拿華斯都係翼，阿古路同迪布尼經常拉邊踢，希望透過多位邊路球員聚集、拉空，導致車路士防線瓦解。上半場有兩三次機會，曼城邊路球員入楔，引車路士嘅後防球員一齊走去邊路，最後好彩車路士球員盡責咁跟到尾，右中堅／後衛艾斯比尼古達包去左閘位解圍、摩西斯跟對手翼鋒入楔成為最後一人，咁先唔駛輸。由呢個排陣，就可以見到哥迪奧拿嘅用心良苦。數據上，曼城成場總共 37 次橫出波，平均唔駛 3 分鐘一次，遠遠拋離車路士嘅 9 次，更可見一斑。只不過 37 次橫出波，成功嘅只有 6 次，就見到唔係戰術不濟，而係球員配合、把握力問題居多。
講真，筆者覺得曼城雖敗不辱，勝負可能只係睇迪布尼空門入定唔入、古圖斯救唔救到阿古路窄位射門、或者巴禾撲唔撲到韋利安嘅單刀而已，呢啲都係運氣或者把握能力。不過，高手過招，就係靠呢啲細節決定勝負，有時好波不如好運，車路士嘅運勢始終係近期英超最強嘅一隊。
