利雲:哥迪奧拿轉死性?

A+A-
圖片來源:路透社
圖片來源:路透社

上周英超 Big Six 得榜首車路士同阿仙奴順利攞足三分,而車路士已經稍稍拋開其他五隊帶出一個身位。要數上周最不幸嘅一隊,筆者就會揀對住熱刺嘅曼城,喺呢場強強對碰之中,唔計球證嘅爭議判決,曼城贏曬點數,哥迪奧拿做足功課,奈何球隊最終都俾人迫和,失分而回。

睇返場波,哥迪奧拿做得最好嘅地方係,經歷完之前嘅小低潮,佢願意妥協,暫時拋開咁多年控球在腳嘅理念,改踢長傳,克制對手。即係「迎難而上」唔 work,咁咪試下「與民休息」囉!無理由仲吓吓「積極有為」架嘛?汲取首循環嘅教訓,控球在腳嘅踢法對住熱刺果班活力充沛嘅生牯仔,好容易俾人迫甩、犯錯,甚至出現致命嘅失誤。見到熱刺對車路士果場,雲耶馬嘅表現,就明白曼城陣中無咩邊個夠佢搶,要減少俾人迫搶出現失誤,咁唯有減少控球,唔做唔錯,避開中場硬碰硬,哥帥出奇不意,只係派出耶耶托尼一個防守中場就係咁嘅原因。而且近幾場,自己後防速度慢嘅問題表露無遺,如果同熱刺班後生鬥跑,只會百分百食塵,所以曼城選擇將後防壓前,用越位陷阱中斷對手攻勢。

圖片來源:路透社
圖片來源:路透社

與此同時,見到熱刺最近轉陣效法車路士踢 343,刻意起用多個快速、靈活嘅中前場球員,將阿古路、史達寧、辛尼同施華都放曬落場,再用長傳、個人突破撕破對手防線,等自己嘅攻擊球員盡量同對手防守球員人少打人少,只要成功一次突破,或者對手犯錯,咁就有機會贏波。曼城前中後部署計過曬數,而且表現得好成功,只不過,熱刺都唔弱,普捷天奴見勢色唔對,下半場都抽走中堅韋馬,用返球隊熟悉嘅 4231,將防線縮返後少少,避免俾曼城嘅長傳突破,表現當堂有好轉。

睇兩軍教頭為咗呢場波落咗幾多心機,都已經值回票價啦!只係哥迪奧拿辛苦部署都只拎到一分,除咗怪球證之外,都要檢討下今季把握力差嘅問題,或者新加盟嘅巴西國腳加比爾捷西斯能夠幫球隊改善呢個問題,同時後防問題依然未解決,高拉洛夫踢中堅好易暴露咗企位嘅問題。識貨嘅球迷應該知道,巴禾撲救率低唔係個人問題,而係成條防線佈防有漏洞,俾對手攻擊球員輕鬆攻門所致。巴禾嘅情況同上季嘅古圖斯一樣,要領隊執靚條防線先可以解決問題。哥迪奧拿究竟係咪轉死性?定係迴光返照?咁就真係要睇多幾場先知喇!

※ 此欄文章為作者觀點,不代表本網立場。 ※