劇本早已寫好，上帝早已預備！阿仙奴兩回合以同樣比數 5:1 俾拜仁慕尼黑大炒，總比數 10:2 於歐聯十六強出局，而隨住聯賽已差不多成為車路士囊中物，得返足總盃可以爭，隨時又係一個四大皆空嘅球季。執教 20 年嘅雲加季尾仲有無得續約？相信係阿迷的話，應該都支持管理層另聘高明，只係英超其他 19 隊的球迷都希望佢留低，無咗雲加嘅英超，一定少咗好多話題、少咗好多歡樂。
無可否認，雲加係一個傑出領隊。90 年代，筆者睇日職時，擁有史杜高域嘅名古屋八鯨係其中一支爭標分子，其時八鯨領隊就係當年名不經傳嘅雲加，其調動、領軍能力已令人留下深刻印象。而執教八鯨不足兩季，雲加就受到阿仙奴賞識，接下來嘅故事球迷都耳熟能詳，阿當斯、基昂、溫特本、迪臣嘅四大長老防線，伯金、皮利斯、龍格堡嘅組織、腳法，仲有高貝利大帝嘅亨利，全季不敗奪冠嘅神話，即使筆者從不是阿迷，都曾為這支踢法秀麗嘅球隊暗暗鼓掌。只係一切俱往矣！
近幾年，阿仙奴陷入一個迷失期，之前經過九年無冠嘅無光歲月，之後奪得足總盃、社區盾，曾經燃起球迷一絲奪冠希望，只係當劇本一再重演，希望就再度消失。之前，阿仙奴仲可以話為起新球場班主關水喉，導致隊中缺乏一線球星，每每關鍵時刻失準，但當球埸起好，奧斯爾、山齊士、施治呢幾個奪冠無數嘅球員先後加盟，球隊表現依舊，球迷就開始明白問題唔係球員卡士唔夠、傷兵問題、或者無錢買人，而係雲加領隊漸漸落後於時代。
時代一直在變，由雲加到埗英超時的高 Q 大棍，到阿仙奴的小組入滲、車路士的防守反擊、巴塞隆拿的 Tiki-Taka，再到現今的前場緊迫，戰術潮流走得比雲加快。而且雲加似是仍未適應金錢足球帶來嘅改變，只願意每季重點收購一兩個星級球員，或者個價唔啱唔買，寧願將價就貨，買入性價比好嘅二線球員。當曼城、車路士、曼聯等不斷高價收購，進行軍備競賽，雲加依然希望提拔幼齒、慢慢育成，只是現代足球愈走愈快，咩都講求即食，細水長流而獲得成功就愈來愈難能可貴。雲加的堅持值得欣賞，只是漸漸不獲球迷歡迎。球隊失去的是信念，不再相信呢個領隊、呢班球員足以奪冠。就好似羅渣士同高普執教嘅成績相差無幾，但後者能夠為球員、球迷注入信念、希望，即使面對困境，依然相信能夠笑到最後，而呢樣係雲加最欠缺嘅！
在現代足球世界，一個領隊能夠䇄立不倒二十載，已經係一個奇蹟。雲加與其繼續受萬人唾棄，倒不如放手一搏，搵一支中小型班重新出發，證明自己仍然係球壇上嘅頂級領隊，只要取得好成績，球迷自然識貨。須知道，雲尼亞里執教李斯特城之前都係俾希臘炒魷無耐，只要勇於挑戰，成功可能就在將來！
