利雲:有其師必有其徒

A+A-
圖片來源:路透社
圖片來源:路透社

有其父必有其子,有其師就必有其徒。雲高爾教嘅曼聯,成日俾人批評係悶蛋足球,而曾經跟佢學師嘅摩連奴今季執教曼聯,聯賽只入 43 球,平均每場入 1.48 球,僅僅比去季全球入 49 球,平均每場入 1.28 球好。對比前季平均每場入 1.63 球遜色。唔講唔知嘅係,費格遜退休後,曼聯攻力最強嘅一季,竟然係莫耶斯執教果一季,聯賽合共攻入 64 球。

曼聯今季攻力絕對算唔上強勁,即使前線有老當益壯嘅伊巴謙莫域加盟,個人獨取 16 個聯賽入球,佔球隊總入球近四成,但係因為其他球員入球能力不足,影響球隊成績。聯賽次席射手已經係經常輪換上場、入 6 球嘅馬達,馬迪爾、拉舒福特、米希達恩呢幾個前線常規正選,平均每人只入 2 至 3 球,隊長朗尼更加乏善足陳。周中賽和愛華頓之後,曼聯已經錄得今季第 12 場聯賽和波,和波比率近四成,冠絕英超,雖然創出聯賽 20 場不敗紀錄,但和波失分過多,只能暫列第六,難怪有外國媒體譏諷摩佬為 The Special One(Point)啦!

睇返英超,除咗曼聯之外,另一隊和波王係由摩佬徒弟卡蘭卡執教大半季嘅米杜士堡,而死因都係攻力疲乏。事實證明,由雲高爾、摩連奴到卡蘭卡呢套執教方法,進攻係最大死穴。其實睇開摩連奴教波都知,進攻從來唔係佢強項,由波圖、車路士、國際米蘭、皇家馬德里,穩守突擊、魚生粥先係殺著。執教皇馬後,摩佬已經開始改善球隊攻守平衡,但奈何始終唔算特別出色,今季嘅曼聯只係近兩三季嘅翻版。

圖片來源:路透社
圖片來源:路透社

曼聯要改善攻力,有幾樣野必須做。首先,要搵到卡域克嘅替身。卡域克雖然唔起眼,但佢有無出場絕對左右球隊攻守嘅流暢度。卡域克一旦缺陣,曼聯即刻尤如盲頭烏蠅一樣。一個組織型防中,係未來曼聯成績起伏嘅關鍵。點樣用卡域克,靴里拉點調整踢法,可能直接影響球隊最後階段嘅發揮。其次,自然係搵到伊巴嘅拍檔。伊巴雖勇,但獨力難支,今季前線佢擔大旗,間接導致馬迪爾、拉舒福特等小將要作出遷就,由正前鋒移後一格,距離龍門遠咗,入球量自然減產。摩連奴應該研究再調整陣容,由季初 4231 到最近嘅 3 後衛陣式,摩佬其實仲未搵到最理想、最攻守平衡嘅勝利 11 人。其實可以嘗試踢雙箭頭,加強攻力,尤其當米希達恩缺陣時,前線少咗一座指揮塔,進攻方式顯得單調,易俾對方死守悶和。雙箭頭可以分擔伊巴重擔,做更多支援、互動。352 或許係曼聯出路。

聯賽雖然又和一場,但似乎摩佬已經將重點擺去歐霸盃冠軍呢個目標上,始終英超競爭太激烈,要爭前四談何容易?倒不如疊埋心水爭歐霸,拎下季歐聯資格可能仲實際。何況,摩佬始終係盃賽專家,鋪鋪清好過長線經營,聯賽火力不足、和波專家又如何?改善攻力,都係留返下季先講啦!

※ 此欄文章為作者觀點,不代表本網立場。 ※