筆者上個禮拜啱啱讚完熱刺普捷天奴青訓勁，跟住發現講青訓唔可以唔講雲高爾。點解？因為有當紅炸子雞 Rashford 搶曬鋒頭，為死氣沉沉嘅曼聯注入少少生氣。網上有人話雲高爾能夠培育咁多新星，係因為佢將一隊球員操到傷曬，變相俾機會年輕球員上陣，所以先咁多後生仔上到位，呢個論點幾有趣，不過你唔好理，雲高爾揸住半隊青年軍都贏到阿仙奴，報返首循環一敗之仇。
睇返嗰場仙魔大戰，曼聯其實唔算太好表現，阿仙奴其實似係輸喺自己手多啲。阿仙奴成場表現最好嘅係奧斯爾同韋碧克，奧斯爾創造左全場最多嘅 6 次機會同錄得全場最多嘅 4 次傳中，都叫做足進攻核心嘅本份，上半場早段阿仙奴表現最好頭嗰 10 分鐘，更曾經妙傳俾隊友單刀，只係接應嗰個叫蒙維爾，先唔可以先開紀錄；韋碧克就除左入波之外，仲不時憑速度牽制對手防線，都算不過不失啦。如果講到全場最差，我就會揀山齊士，因為全場隱形，又少個人突破，更加 3 次射門無次中龍，以佢級數黎講，仲唔算最差？
另外嗰邊，曼聯表現其實都唔多好，傷兵太多，表現危危乎，中場靴里拉患得患失、馬達隱形、迪比就花巧獨食有餘，只係時來運到，靠 Rashford 扮演雷霆救兵，先令到曼聯復仇成功。暫時黎睇，Rashford 捕位強、冷靜，只要成日有得出場、慢慢培育下，都有機會正式上位。
阿仙奴表現下滑，個人認為都係受歐聯影響居多，始終上周中先對完巴塞隆拿，嗰場踢得有板有眼，唔差過巴塞太多，但搏完一場，回氣都要返多少時間，歐聯副作用之下，所以山齊士等主力球員先踢得咁差，臨尾想谷都谷唔起。
嚟緊呢個周末，阿仙奴要作客對住當打嘅熱刺，都幾大機會失分，始終熱刺班波年齡結構好，而且艾歷臣、哈利簡尼、艾達維特三線主力今季表現穩定，愈黎愈成熟，俾車路士曼聯曼城仲表現得好。早前筆者已經講過，一月轉會窗阿仙奴需要買個高大正中鋒先有力保持鋒力到季尾，但唔知係咪雲加性格如此，定最強之人已在陣中？最後都係無補充鋒線實力，基奧特腳頭無靈，而家只能夠靠傷癒復出無耐嘅韋碧克，要挑戰今季幾穩陣嘅熱刺防線，就唯有睇下山齊士能唔能夠及時回勇喇！
阿仙奴今季會唔會又行返條舊路，又經歷歐聯出局、聯賽第四？咁就真係要問過普捷天奴先喇。
