Marvel 宣佈英國男星 Benedict Cumberbatch 於 10 月中會來港宣傳新片「奇異博士」（Doctor Strange）。消息一傳出，我身邊不少女性朋友的興奮程度，遠超本人想像。要比喻，哄動程度大概就似 20 年前林志穎來港開演唱會，或者「流星花園」時代的 F4 訪港，被期待度遠超一般荷里活男星。如果只計外表，你很難把 Benedict Cumberbatch 拿來跟林志穎或言承旭放在同一條線，說他是陳欣健類型，可能還較貼切。
能夠令香港女生瘋狂，當然因為「新福爾摩斯」（Sherlock）的受歡迎程度極高。不是誇張，不只一位女性閨密向我透露，見到 Benedict Cumberbatch，會有性衝動。我問，有冇太誇張呀，我都有追「新福爾摩斯」，也認同男主角演技出眾，將現代版大偵探演得活靈活現，但，陳欣健令你有性衝動？然後，他們解釋：「單單他用典型英國口音一輪嘴讀出連串台詞，已經立即有反應，再加上一副充滿自信的表情，點抵擋呀？」我呼一口氣，香港女生的進步幅度，真的超遠同年紀男生呀。
當跟我同一代的男生仍在懷緬藤原紀香，新歡是小丑女，即係都係睇上圍級數啦。我們的女性朋友，可能已經輕視沒內涵的靚仔。連古天樂也因為是古老闆才受到垂青，連黎明也因為金句和明福俠才脫胎換骨，連張智霖也不斷販賣好男人形象，單憑一張俊臉想橫掃中女界，在今日已變成妄想。最慘是連少女界的喜好也好像有所轉變，幾年前，她們還會因為「吸血新世紀」（Twilight）的 Robert Pattinson 好靚仔而神魂顛倒。今日？如果有個得個樣的靚仔在他們面前死 Chok 難 Chok，只會換來一片嘲笑聲。
想討好女觀眾，真係難，要有性格要有才華要愛老婆要夠幽默最難係要有味道，抽象到極點。林志穎這種還像小學雞借助炫耀 Apple 新產品來沾沾自喜的，究竟明白不明白世界已經改變了？
- 電影「奇異博士」預告片 影片來源：@Marvel Studios Hong Kong/YouTube
