利雲:車路士的三大問題

A+A-
圖片來源:路透社
圖片來源:路透社

英超車路士又輸一場!繼打和史雲斯 2:2、輸俾利物浦 2:1 之後,再慘敗喺阿仙奴腳下 3:0,聯賽連續三場不勝,仲有對阿仙奴果場,如果唔係半場已經勝負分明,阿仙奴稍稍縮後黎踢,車路士隨時輸得仲甘。經過咗季初三連勝後,陷入一個小低潮,令人關注車路士會唔會再一次淪為中游球隊?踢咗幾場波,觀察到車路士有幾個大問題要執。

第一,人人都知嘅後防老化問題。泰利受傷、蘇馬仍未傷癒,搞到卡希爾配雷斯持續踢正選,一個體力下降、一個衝動,再加上右閘伊雲奴域速度愈來愈慢,對住利物浦、阿仙奴呢類攻擊線出色嘅球隊,自然任人魚肉啦。

第二,干地太過保守。除咗對利物浦遲遲唔換人外,對阿仙奴半場落後三球,下半場第一個換人,並唔係換前線球員入黎搏殺,而係抽走法比加斯,換入左閘嘅阿朗素,由 4141 變做 541,純粹想止蝕,而無諗過追平。干地嘅保守亦都感染咗一班球員,球迷們有興趣可以重看利物浦軒達臣、阿仙奴禾確特嘅入球,車路士嘅防守球員同歐洲國家盃嘅意大利一模一樣,後衛企位好精準咁連成一線,差別在於意大利球員會解圍,而車路士盲目咁保持平排、有波都唔追,當防中位置出現漏洞,後防俾人一劏就穿,中堅驚包越位而唔肯跟到底,最後就失球而回。

第三,守不穩亦攻不銳。防守嘅問題咁嚴重,部分其實源於攻力不足。好似利物浦攻強於守,只要前線火力足,後防輸幾多都追得返,最經典當然係上季對諾域治嘅比賽啦!而干地對利物浦、對阿仙奴,都係希望以守為先,進攻只靠三至四名球員完成,其餘龜縮後場,前線牽制力不足,俾對手控制皮球,後防自然容易受壓。當球隊失波後,前線根本唔夠火力追返,哥斯達連續兩場受制對手人盯人戰術,波都未拎定對手已經殺到黎,咁樣又點可以繼續組織攻勢丫?

呢幾個問題都幾嚴重,不過唔係無得救。好似嘗試踢五後衛,阿朗素、艾斯比利古達多啲走上前線做支援,增強攻力;將伊雲奴域擺返中堅位,以位置感掩蓋速度問題;中場干堤係鐵膽,最難搞嘅應該係夏薩特,如果球隊踢 352 難以搵到位安置佢、踢 442 中場中又可能做唔到攻守平衡,或者只能夠特別幫佢打造一個自由人位置俾佢發揮 ;前線好似意大利咁,用艾達馬田斯同柏利互相支援,將巴舒亞伊放返落正選,等哥斯達唔駛孤掌難鳴。睇咗幾場,干地其實不斷微調、修正緊,只不過要同時間競賽,因為唔知老細耐性有幾多?仲忍到幾場輸波?

※ 此欄文章為作者觀點,不代表本網立場。 ※