呢個禮拜歐洲主流聯賽休息，得返國際賽，而國際賽多數係啲強弱懸殊嘅比賽，又或者揸流攤嘅友誼賽，大部分都無嘢好睇，惟有去打吓機好過。講起打機，相信唔少球迷除咗睇波之外，亦會打足球 Game，而家大部分人玩嘅應該係 FIFA 同埋舊稱 Winning 嘅 PES 呢兩大遊戲。今年呢兩隻 Game 都分別加入咗新元素，FIFA 多咗個故事模式，玩家可以一嘗 Alex Hunter 由青年軍到攞冠軍嘅經歷；而 PES 就搵咗兩個足球評述員配音，等玩家一邊玩一邊聽住伍生同馬生講「個波向前傳出」、「呢個龍門抵加人工俾佢啦」，好似置身其中咁樣，增加親切感。只不過，筆者最喜愛嘅足球 Game，始終係開始走向沒落、愈來愈少人玩嘅 FM（Football Manager）。
提起 FM，相信大部分球迷都會識得呢隻神作。FM 可以話係 Big Data 嘅先驅，廿幾年前已經開始廣泛收集球員數據，再將球員嘅能力細分為廿幾三十項數據加以量化。遊戲數據以寫實聞名，近年已經愈來愈多球隊借助 FM 的數據作為轉會市場嘅參考，遊戲中數值極強嘅新星，通常數年間就會登陸歐洲主流聯賽舞台，喺現實中一展身手。當然，亦有唔少新星發展不似預期，受傷患、際遇影響而最終默默無聞。
遊戲中，玩家就扮演教練，負責買賣球員、助教、制訂訓練系統、陣式、臨場變陣換人等等。最特別或者同其他遊戲最唔同嘅地方，就係玩家唔可以控制球員行動，即係唔可以自己控制美斯或者 C 朗拿度射波反敗為勝，最多只能夠換人或者變陣取勝，仿如真實教練咁樣，即使球員落場唔受控制都無可奈何。相比起 FIFA 或者 PES，FM 好難透過技術以弱勝強，細球會最多只能夠以廉價買入一堆新星慢慢培養，等佢地成長，或者打起自己隊嘅球員低買高賣，增加球會資金再買球星，咁先可以同強隊競爭，爭一日之長短。喺現今潮流之下，大部分玩家都鍾意即食，或者純粹消閒，邊個有時間慢慢建立一隊球隊，或者由低組別開始挑戰丫？FM 沒落並非無因。
FM 最大問題係太真實，閣下愛隊現實嘅實力如何，遊戲數據比較接近，唔似 FIFA 或 PES 咁，球員數值偏離現實、甚至稍稍偏高，好似朗尼今季數據繼續 80 以上。寫實，即係無幻想，球迷進入虛擬世界，隨時再受多一次現實中嘅挫折，咁樣又有何樂趣可言？好似現實中俾人批評唔莊嚴唔尊重，返到遊戲一樣要「英超曼聯再輸一場」；倒不如自己控制命運，將美斯、尼馬呢班大牌球星收歸旗下，實實在在咁控制佢地，助攻朗尼拎英超冠軍？
