歐國盃話咁快就黎到尾聲，淨返決賽法國大戰葡萄牙一場波就完結喇！東道主法國殺入決賽過程充滿說服力，尤其係四強對住德國，全場控球、形勢較差嘅情況下，基沙文把握到舒韋恩史迪加同紐亞嘅兩次犯錯，協助法國 2:0 贏波晉級，理應成為今屆大熱門。
今屆歐國盃開波前，最多人估普巴應該可以趁住呢屆賽事上位，奠定一代球星地位；踢完頭兩場波，大部份人會覺得係到連續兩場臨完場絕殺嘅皮耶上位，一個救全家；最後黎到法國今屆嘅第七場賽事，好多球迷已經唔理普巴同皮耶，因為基沙文已經正式彈出。基沙文，係咪有力成為新一代球王？成為同美斯、C 朗拿度鼎足而立嘅世界第三人呢？
基沙文細個時候因為身型矮細同埋被認定無天份而俾唔少球隊拒絕左，幸得皇家蘇斯達收留，成為職業球員，之後曾經俾護級嘅富咸睇中，最後又因價錢貴而叫停，最後落戶施蒙尼嘅馬德里體育會，終於得遇伯樂，盡展所長。如果美斯同 C 朗拿度係單天保至尊嘅球王，基沙文就係整體戰嘅球王。即使個人技術比唔上美斯、C 朗拿度，不過埋門把握、戰術意識、同隊友嘅配合度，毫不遜色，甚至有過之而無不及。基沙文最犀利嘅地方，係無論踢球會定國家隊，佢都會主動配合隊友，以球隊利益為重，同不斷浪射嘅 C 朗拿度相映成趣。
由揭幕戰到黎到決賽，基沙文由拉邊踢逐漸移入中路，愈踢愈生猛，累積入 6 球，除非 C 朗拿度、基奧特或者皮耶大發神威、大演帽子戲法，否則今屆神射手獎已經坐定粒六係基沙文嘅囊中物。呢個數據清楚顯示到法國第一前鋒，唔係基奧特，唔係無份入選嘅賓斯馬，而係佢。除左入球，對德國一場，基沙文表現都搶曬鏡，射門次數係兩隊最多嘅 7 次；2 次創造機會次數只係略少於卻奧斯同基奧特嘅 3 次；過人次數係全場最多嘅 5 次；成功搶斷對手傳球都有 2 次。呢堆數據見到基沙文瓣瓣有，助攻助守，而且可以見到佢全場不停走位，拎波嘅時間經常走去基奧特或其他隊友身邊，配合隊友（踢法有啲類似意大利嘅一對前鋒，不過更當打更具質素），表現搶眼。
基沙文距離歐國盃冠軍嘅殊榮只差一步，佢究竟能唔能夠成功登基成為新一代球王？定係會好似歐冠決賽咁再次屈居於 C 朗拿度之下？還是好似「亞軍庭」球王美斯退役而抱憾終生？今屆歐國盃，或者只係故事嘅開始！
