A 組（俄羅斯、沙特阿拉伯、埃及、烏拉圭）
主辦國被撥入第一檔次，究竟有甚麼理由？舉手：為了方便揭幕戰有主辦國份。似去屆由巴西主辦，問題不明顯；但今屆由俄羅斯搞，就似 8 年前的南非世界盃，隊隊都以為抽到 A 組便發達。別傻，8 年前，A 組除了南非，還有烏拉圭、墨西哥和法國。結果，南非的確出局，但榜尾是法國。
揭幕戰由俄羅斯對沙特阿拉伯，比起 8 年前的南非對墨西哥，戲碼更弱。你話由普京一手安排，我真係會信。對一隊亞洲弱旅，是否十拿九穩？都未算係。因為俄羅斯也不強。看兩年前的歐洲國家盃，或者熱身性質的洲際國家盃，跟十年前有艾沙雲當打的一代，低了幾個級數。雖然，看了這麼多屆，好清楚，熱身賽跟打真軍可以有天堂跟地獄的差別，都唔係咁甩皮甩骨啩？受惠或受害於國內經濟發展，俄羅斯主力球員多數效力國內球會，不似前輩們擁有踢歐洲四大聯賽強隊的經驗。然後，你看看俄羅斯球會在歐聯歐霸有甚麼戰績，大概便明白俄羅斯的水平，屬於甚麼級別。
想搏一搏出線十六強，好大程度視乎沙拿究竟仲有冇傷。烏拉圭就算失去蘇亞雷斯，也是一支實力平均的勁旅，埃及沒有沙拿，是打了個六折。就算沙拿真係神奇康復，到季尾狀態也明顯下滑，第一年在英超當上絕對主力，賽事競爭性遠超意甲，超出了負荷無法趕得及回氣也不足為奇。
A 組總結：信普京的強人領導，貼俄羅斯在主場跟烏拉圭齊齊出線，對得住江東父老。
B 組（葡萄牙、西班牙、摩洛哥、伊朗）
歐洲足球水平是否遠超亞洲和非洲？看 B 組最終是否順利由西班牙跟葡萄牙跑出，大概可見端倪。我傾向認為歐洲跟亞洲的差距一向極大，南韓在自己地頭加埋球證幫忙晉身四強，事後回看，是天時地利人和集於一身的可一不可再。歐洲跟非洲的差距也只會愈來愈闊，你看看有幾多非洲血裔的球員選擇入籍歐洲的國家隊，便知道在全球化之下，富者愈富，強者愈強。
摩洛哥在外圍賽淘汰科特迪瓦入圍，好似好勁。事實上，當年又杜奧巴又托尼兄弟的科特迪瓦，都尚且未試過在世界盃打入次圈，咁你話有幾勁？伊朗也是差不多，外圍賽以不敗姿勢晉級，但身處在中國隊都有三勝三和四負的組別，不敗又如何？留下懸念可能只在西班牙跟葡萄牙究竟可以走到幾遠。
跟全盛時期相比，西班牙的星味當然削咗九倍。看今屆得番 3 位巴塞球員入選，大約可以推斷出西班牙國家隊跟巴塞隆拿是有種唇齒相依的關係。失去了昔日驚人的默契和以韋拿為首的高強把握力，要西班牙再似 2008 年至 2012 年期間的無敵橫掃，是不可能，但斷估也不會似去屆世界盃的輕敵，被荷蘭及智利羞辱，畢竟同組對手級數低了很多，球員的爭鬥心卻大了很多。食粥食飯其實好睇班皇馬球員究竟孭唔孭到飛，不要忘記，入選的皇馬球員，尤其負責進攻的，好多都僅是這支歐洲冠軍的二線兵。
至於葡萄牙，兩年前歐洲國家盃近乎半奇蹟地成為冠軍，令 C 朗打破宿命。打入決賽前避過晒傳統勁旅固然好彩，但決賽在 C 朗被踢傷之下還能夠擊敗人腳好得多的法國，就一定不止運氣。黃金一代也做不到的，結果靠拿尼等失意兵實現，世事真無常。怕只怕運氣已花光，鬥志也隨著贏過一次大賽被打散，要看好勝心強到不得了的 C 朗，能否繼續鼓動到隊友發揮出超水準。
