方俊傑:「怪奇物語」懸疑必定要懷舊

A+A-

近排,最多人談論的美劇,應該是 Netflix 出品的「怪奇物語」(Stranger Things)。一來食正 VR 熱潮,在 YouTube 上載了兩分鐘 VR 影片,讓用家體驗 360 度係咪真係驚嚇得更多。另外,女主角找了上個世紀的美女代表 Winona Ryder,也勾起不少 70 後 80 後的美好回憶。

是策略,不是巧合。故事以 80 年代初作背景,場景貼滿「大白鯊」(Jaws)海報,對白不斷提及「星球大戰」(Star Wars),還未計部分鏡頭極有史丹利冦比力克及希治閣電影的影子。Winona Ryder 由昔日的少女變成今日扮演年輕人的媽媽,象徵意義甚大。劇情則可算集百家之大成,既有「X 檔案」(X-Files)式政府陰謀,班政府高官的造型,跟「X 檔案」的煙剷,簡直同出一脈。又有 J.J. Abrams 最擅長的神秘怪物襲擊寧靜小社區,加上超能力少女,校園男女爭風呷醋。第一季得 8 集,要濃縮 90 幾種元素,你可以想像劇集的節奏有幾快。

  • Netflix 新劇預告片 來源:@netflix/youtube
圖片來源:IMDb
圖片來源:IMDb

故事以小男孩無故失蹤作主線。人人以為他已死,就只有阿媽堅持不服氣,仲偶爾聯絡到溝通得唔清唔楚的疑似兒子,搞到個大仔同關係良好的警長要陪佢一齊追查;另一邊,失蹤小孩的幾個好兄弟,認識了來歷不明的女孩,屢遇怪事,運用科學知識,猜出失蹤好友的去向。兩條線,不斷揭發更多真相,但同時暴露出更多未知的陰謀,有待解決。這是很典型的美式懸疑劇格局。

與別不同的,變得來自那種懷舊味,也必須要有這種懷舊味。否則,故事放在現代的話,當你見到小朋友用對講機溝通,見到媽媽在家等固網電話鈴聲響起,你會話有冇搞錯,點解唔用手機。道德觀又是另一回事,那個年代,要勾引個女仔上床,還要創作好多計劃,又開派對又整濕件衫,先成事。以為女朋友有第三者,會嬲到在大街大巷噴上賤人字樣。今日?你可能要接受這是必然發生的事實了。咁個校園三角戀又點成立呢?3P 就差唔多。

Stranger Things 劇照
故事放在現代的話,你會話有冇搞錯,點解唔用手機。 Stranger Things 劇照
※ 此欄文章為作者觀點,不代表本網立場。 ※
方俊傑 特事特辦

方俊傑,利物浦球迷,前「壹週刊」生活組編輯。主打電影介紹、人物專訪、體育專欄、電視表。著有小說「失戀二十」。